Stefnumótun

Ég sé ekki inn í framtíðina og veit ekki hvernig hún verður – nema þetta eitt, að samfélag sem ekki hugar að fortíð sinni, á ekki bjarta framtíð.
Sigurbjörn Einarsson

Þegar Keflavíkurkirkju var ákveðinn staður og útlit hennar teiknað, höfðu menn meðal annars tvennt í huga. Annars vegar það að byggingin stæði af sér óveður og ofsa, minnugir reynslunnar af því þegar gamla Keflavíkurkirkjan skekktist á grunni í storminum 1902. Hún var því meðal fyrstu steyptu kirkna á landinu. Þá var hún byggð spölkorn fyrir ofan byggðina þar sem minni hætta var á að særokið lemdi á kirkjunni. Hins vegar, vildu menn að kirkjan heilsaði sæfarendum er þeir sigldu inn til hafnar. Kirkjuturnin skyldi blasa við af hafi og var hann því hafður á austurgafli kirkjunnar. Þar skyldi inngangurinn í kirkjuna og vera, sem leiddi til þess að kirkjan snýr „öfugt“ við það sem hefðbundið er með kirkjur – altarið vísar til vesturs en ekki austurs svo sem venjan er.

Tvenn sjónarmið

Þau sjónarmið, að kirkjan sé traust og að hún vísi mönnum veginn, eiga einnig við um sjálfa starfsemi kirkjunnar. Minnug frásagnar Jesú um mennina tvo sem byggðu sér hús – annar á sandi en hinn á bjargi – viljum við að kirkjan okkar standi óhögguð þegar óveðrin ganga yfir. Þá þurfum við jú sérstaklega á góðu skjóli að halda. Fyrir því höfum við fundið á þessum tímum þegar staðan er alvarleg í atvinnumálum einkum hér á Suðurnesjum. Þá hefur Keflavíkurkirkja gegnt mikilvægu hlutverki sem skjól þegar vindarnir næða. Margir getað leitað aðstoðar í kirkjunni, sem vinnur náið með Hjálparstarfi kirkjunnar og svo hefur kirkjan staðið í fylkingarbrjósti með öflugan hóp sjálfboðaliða og starfsfólks við að safna fé í Velferðarsjóð á Suðurnesjum. Þá eru ótaldar stundirnar þar sem fólk hefur komið í kirkjuna þegar sorgin þjakar og fokið virðist í öll skjól. Sr. Ólafur Oddur Jónsson heitinn stofnaði Bjarma í kjölfar mikilla áfalla hér í samfélaginu og hafa samtökin áorkað miklu til stuðnings og sálgæslu. Kirkjan okkar stendur á traustu og öruggu bjargi, fyrir því eru mörg dæmi.
Þá er Keflavíkurkirkja bæði viti og leiðarljós fyrir samfélagið sem hún þjónar rétt eins og hún var í augum sjómannanna sem sigldu inn til hafnar í Keflavík. Ungir og aldnir sækja þangað boðskapinn um sigur lífsins og kærleikans og skyldur okkar til þess að leggja náunganum lið og þjóna Guðs góðri sköpun. Þjónusta kirkjunnar nær víða um stofnanirnar í bæjarfélaginu og allstaðar mætir hún opnum örmum. Boðskapur hefur birst í margvíslegri mynd í lífi og breytni þeirra sem taka á móti honum en hann er ætíð til uppbyggingar og til þess að efla trú von og kærleika hjá einstaklingum og samfélagi.

Þetta eru tvær grunnstoðir í þjónustu kirkjunnar og svo verður áfram.

Stefnumótun

Kirkjan okkar stendur hins vegar á tímamótum. Eftir hálfan áratug heldur hún inn í nýtt árhundrað og slíkur áfangi kallar á endurmat og nýja sýn til framtíðar. Haustið 2006 hófst stefnumótunarvinna á vegum safnaðarins þar sem lagt var mat á það hvernig skipulag hans ætti að vera í takt við kröfur þær sem samtíminn gerir. Verkefnið var unnið í nafni sóknarnefndarinnar en fjölmargir fundir voru haldnir utan veggja kirkjunnar þar sem vinnan var kynnt fyrir ýmsum hópum og kallað eftir nýjum hugmyndum.

Spurningarnar sem við unnum með voru:

. Hversu vel vinnum við þau verkefni sem við tökum að okkur?
. Hversu mikilvæg eru verkefnin okkar?

Stefnumótun snýst um forgangsröðun og þegar við höfðum svarað þessum mikilvægu spurningum kom á daginn að sumt sem vel var unnið var ekki mjög áríðandi og auðvitað hitt líka – að lögð var ónóg vinna við það sem skipti miklu máli fyrir kirkjuna. Haustið 2007 lá stefnumótunin fyrir og voru þar eftirtalin atriði sett í aukinn forgang í safnaðarstarfinu:

. Æskulýðsmál
. Kærleiksþjónusta
. Tónlistar- og menningarstarf
. Tengsl við aðra hópa og félög í samfélaginu

Á sama tíma og dregið hefur verið úr ýmsum verkefnum í kirkjustarfinu hefur meginþunginn verið settur á þessa liði í starfseminni. Þeir hafa fyrir vikið eflst jafnt og þétt. Þá býr kirkjan að einstökum hópi fólks sem leggur henni lið sem hefur bætt mjög þjónustuna á þessum sviðum.

Sjálfboðaliðar

Þá kom skýrt fram í stefnumótuninni að sérstök rækt skyldi lögð við sjálfboðaliðavinnu á vegum kirkjunnar. Þetta hefur skilað sér í sístækkandi hópi fólks sem finnur köllun sinni farveg í starfsemi kirkjunnar. Þrír hópar starfa innan safnaðarins til viðbótar við sóknarnefndina og þær undirnefndir sem henni tilheyra:

. Æskulýðshópur
. Kærleikshópur
. Menningarhópur

Hópar þessir hafa bæði skipulagt og framkvæmt ýmis verkefni á vegum kirkjunnar, hver á sínu sviði og eru margir þeir viðburðir meðal þess eftirminnilegasta sem kirkjan hefur staðið fyrir á síðustu misserum. Dagskrá kirkjuvikunnar er að stórum hluta í höndum þessara sjálfboðaliða. Þá hefur vinna á vegum hjálparstarfsins verið að miklu leyti borin uppi af sjálfboðaliðum sem lagt hafa á sig mikla vinnu til þess að koma náunganum til góða. Forgangsröðun og aukin þátttaka sjálfboðaliða í starfi Keflavíkurkirkju hefur gert henni kleift að auka þjónustu sína á sama tíma og sóknartekjur hennar hafa dregist saman um leið og lánin sem á kirkjunni hvíla hafa hækkað.

Framtíðin

Hvernig verða svo komandi ár í starfi Keflavíkurkirkju? Hér í upphafi er vitnað til orða Sigurbjörns Einarssonar biskups, að hann gæti ekki frekar en aðrir séð inn í framtíðina. Eitt gæti hann þó fullyrt í þeim efnum – að samfélag sem ekki hugar að fortíð sinni ætti ekki bjarta framtíð.

Hvað getum við þá sagt um framtíð Keflavíkurkirkju út frá þeim lærdómi sem fortíð hennar færir okkur? Fjárhagslega má búast við erfiðum róðri en það segir þó ekki nema hálfa söguna. Kirkjan hefur á löngum aldri verið einstaklega öflugt samfélag ólíkra einstaklinga sem hafa verið reiðbúnir að leggja mikið á sig fyrir kirkjuna sína. Ef áfram verður unnið í þeim anda sem sóknarnefnd lagði til í stefnumótunarvinnu sinni mun kirkjan og samfélagið í kringum hana halda áfram að vaxa og dafna. Þótt unnið sé í þeim anda sem nútíminn kallar á og krefst verður áfram unnið samkvæmt hugsjónum frumkvöðlanna: Byggt verður á traustum grunni og kirkjan mun áfram rísa upp úr völlunum, eins og viti fyrir alla þá sem leita eftir leiðsögn í lífi sínu og sinna.

Stefnumótun Keflavíkurkirkju, lokadrög til samþykktar.

Ársgömul stefnumótun: Orð og efndir - Lagt fram á aðalsafnaðarfundi vorið 2008.

Staða stefnumótunarvinnu vorið 2009

Keflavíkurkirkja 2007 til 2015: Stefnumótun í Keflavíkursókn
Opið hús sunnudaginn 4. mars kl. 11:00 til 14:00

Hvað skiptir mestu máli í starfsemi safnaðar? Er það fjöldi kirkjugesta á hverjum sunnudegi og þátttaka í annarri kirkjulegri starfsemi? Hvað með fjölbreytnina, eigum við ekki að bjóða upp á starf fyrir sem flesta? Einnig er verðugt að spyrja hvernig kristin kirkja á 21. öldinni bregst við tilvistarspurningum fólks og hvernig hún nær til hugsana okkar, vona og þrár eins og boðskapur Krists gerði og gerir enn. Og afraksturinn, skiptir hann ekki máli líka? Kirkjan hefur frá öndverðu haft skyldum að gegna langt út fyrir sinn ramma. Að loknu helgihaldinu héldu menn endurnærðir út á strætin og göturnar og gerðu þar sitt til þess að létta undir með þeim sem þyngstar byrðarnar báru.

Keflavíkurkirkja efnir þessar vikurnar til samræðu við ýmsa hópa í sókninni og leggur þar meðal annars fram spurningar sem þessar. Einhverjum kann að þykja kyndugt að þetta skuli nú ekki vera komið á hreint eftir bráðum 2000 ára starf kristinnar kirkju! Aðrir kunna að líta svo á að þetta sé eitthvað sem komi þeim ekki við.

En við í Keflavíkurkirkju lítum svo á að slík samræða geti leitt af sér nýjar og ferskar hugmyndir enda aðstæðurnar síbreytilegar og kröfurnar að sama skapi. Þá bendum við á það að kirkja er ekki bara hús, heldur fólk og viljum jafnframt minna á að hér standa allar dyr opnar fyrir þeim sem vilja leggja sitt af mörkum til uppbyggilegs safnaðarstarfs.

Niðurstaða þessara samræðna ætti að liggja fyrir næsta haust en þá lítur stefnumótun Keflavíkurkirkju dagsins ljós. Fram að því verða hugmyndirnar kynntar á fundum víðsvegar í sókninni. Fólk er hvatt til þess að hafa samband ef það óskar eftir því að fá að taka þátt og kynnast þessari vinnu.

Verkefnið hefur nú verið kynnt fjölmörgum hópum í samfélaginu þar sem efnt hefur verið til samræðu um það sem mestu skiptir í safnaðarstörfum. Er ánægjulegt að hafa fengið að taka þátt í umræðum sem fram hafa komið á þeim kynningarfundum.

Sunnudaginn 4. mars frá kl. 11:00 til 14:00 var opið hús í Keflavíkurkirkju. Dagskráin hófst með guðsþjónustu þar sem báðir prestarnir þjónuðu, kórar kirkjunnar sungu. Að því loknu var gestum boðið í Kirkjulund þar sem fyrstu drög að stefnumótun safnaðarins voru kynnt og fólki gefinn kostur á að deila með okkur skoðunum sínum á því hvernig það vill sjá safnaðarstarfið þróast í kirkjunni. Einnig var horft til kirkjubyggingarinnar og umhverfis hennar, meðal annars fyrstu drög að nýjum innréttingum í kirkjuskipi. Hugmyndir fermingarbarna að framtíðarstefnu kirkjunnar voru sýndar og þá voru á veggjum gamlar og fágætar ljósmyndir úr kirkjustarfinu. Veitingar voru í boði safnaðarins og kórar kirkjunnar sungu fyrir gesti.

Kl. 20:00 var svo guðsþjónusta með altarisgöngu þar sem Karlakór Keflavíkur söng. Að messu lokinni var látið reyna á eina af þeim hugmyndum sem fram hafa komið í ferlinu: Stólræða prestsins var tekin til umfjöllunar að messu lokinni!

Framtíðarsýn Skálholtshópsins

Kynning fyrir foreldra fermingarbarna

Kynning á héraðsfundi Kjalarnessprófastsdæmis 7. mars

Verkáætlun